Í þessum hlaðvarpsþætti heyrum við í Bettinu Vass, ungverskri konu sem hefur búið á Íslandi í sex og hálft ár. Hún elskar að mynda fólk og á í erfiðu sambandi við samfélagsmiðla, eins og kannski fleiri ljósmyndarar. Saga hennar er áhugaverð og ástríðan fyrir ljósmyndun skín í gegn í þessu spjalli sem við áttum á BikeCave í Skerjafirði núna í lok nóvember.
Það var sérstaklega gaman að heyra Bettinu tala um það hvernig hún nálgast fólkið sem hún myndar. Hún ber sanna virðingu fyrir því sem hún gerir og það er góð áminning á tímum sjálfunnar og samfélagsmiðla.
Til að skoða myndirnar hennar og fræðast meira um hana bendi ég á vefinn hennar, https://www.bettinavass.com/ og hún er á instagram undir nafninu @bettinavassphoto.
Uppáhaldsmyndin í augnablikinu
Við spjölluðum um margt á þessum rúma hálftíma sem við sátum á Bike Cave. Ég bað Bettinu um að segja okkur aðeins frá uppáhaldsljósmyndinni sinni. Það er kannski svolítið skrítið að ræða ljósmyndir í hlaðvarpi en Bettina gaf mér góðfúslegt leyfi til þess að birta myndina sem hún talar um.
Tryggvi Már Gunnarson 